Co by niy pedzieć, to powiym, że świat nasz zaczyno sie zmiyniać. Niy byda Wom pisoł o Hondach czy jakiś digitalach ino o nos wyndkorzach. Myślicie, że ino sprzynt sie zmiynił? Niy. Zmiyniło sie tyż towarzystwo.

Kaj tam kiedyś kto pomyśloł, coby baba na ryby zabiyrać. Baby ino kanapki na ryby miały zrobić, łobudzić na czas coby goronco kawa już na stole była, przipilnować coby wszystko chopeczek zabroł. Kiero była bardzij łodważno to sie pytała kiedy przijedzie nazod, coby łobiod był na stole.

Czamu tak było? Czamu te baby niy walczyły ze swoimi chłopeczkami, coby ich tyż na te ryby zabiyroł. Niy musiałaby chytać tych ryb. Siedziałaby se na leżaku, ksionżka babsko czytała i łopalała sie. Przeca terozki tak niyroz jest. Wiela razy widza jako piykno babka co sie łopalo na leżaku a chopek kija moczy. Niy powiym już, co terozki coroz wiyncyj te chopy sie łopalajom a baby chytajom ryby.

My za łebka na ryby chodzili sami, bez dziołchów. No bo czy tako dziołcha nabije glizda na hoczyk? Na futer jeszcze by mogła chytać, ale co na futer brało? Wajska jakoś abo flosa. Karachy czasym brały na futer ale to musioł być futer z grysiku i zarobiony budyniym koniecznie różowym. Takich tajymnic nikt nikomu niy godoł. Kiery wiedzioł jak futer taki zrobić, tyn chytoł. Co synki garnców napolili i szmary łod matki dostali tego już niy musza pisać. Ino mama łod Antka znodła patynt na taki futer. Chronili my go latami. Futer mogli my robić fest gibko i niy spadoł z hoka. Kożdy nom zazdroscił tego furu. Jakim cudym tajymnica ta została przekozano inkszym wyndkorzom - tego to jo niy wiym.

Terozki momy pellety, jakieś dipy i niy wiadomo jakie cuda. Kiery teroz chyto na futer z grysiku? Ale co my tam o futrze. Podziwejcie sie na Waszych stanowiskach wyndkarskich, kto tam wele Wos wyndkuje. Sam siedzi jakiś starzik z kijkiym co pamiynto czasy NRD. Dalij jakiś szpecjalista bo młynki mo na glanc. Byrna wali łod nich, że ani paczeć niy idzie. Kijki mo na sztatywach i fol buczków wele nich. Dalij synek jakiś mynczy sie kijem, co jest łod niego dziesiynć razy dukszy. Kij wielgachny ale ryby malućkie jakieś. Wejżij sie na drugo strona. Dwa ciynżkie kalibry. Chyba kumple bo wele siebie mają chyba z sześć kijów, no ale kiery im podskoczy? Waga super ciynżko.

Dziwej sie tam dalij, tam na tym półwysepku. Widzisz to cudo? Syrynka jakoś nogi dostała i terozki śmigo ciyniutkim kijkiym. Jak łona stoi nad tom wodom! Jak piyknie czimie wyndka. Czopeczka podobno do dżokejówki i z zadku gowy dugie blond włosy spływajom ij na plecy choby jaki wodospad co zastyg, a malyrz jakiś, ta woda pomalowoł na złoto. Co łona mo łobleczone tego niy widzisz, bo stoi pod byrna i wydowo Ci sie, że cosik czornego ale tak łobcisłe, że wyglondo choby stoła sago. Łoczy przeciyrosz, szczypiesz sie, bo sprawdzosz czy to aby niy syn. No i co ciaproku, ani eś niy zauważoł, co kaper terozki Ci wyndka ukrod. A ty dalij pacz, za chwila do dom niy bydziesz mioł co niyść. Paczysz tak i wzdychosz. Czamu moja tako niy jest. Hamuj, hamuj!! Po Ci tako baba? Coby kożdy sie za niom ślinił? Łona by chytała ryby a Ty za niom lotoł. Na pierona mi tako baba. Wola moja, bo sie niy boja jak na ryby ida. Jak kiery by tam do nij podskoczoł, niech do mie z pretynsjami niy przichodzi i som terozki sie broni. Wola być tym, co mogom paczeć a niy pilnować. No ale niy kożdy jest taki jak jo.

Znom terozki kupa piyknych dziołchow, co ze swoimi chopami na ryby jeżdżom, abo jeszcze gorzij, same na te ryby idom. Do kogo gorzij do tego gorzij. Mie tam to pasuje. Czy zawsze jak przijda z ryb musza mieć jakoś ryba chycono? Idzie pedzieć - Babo tyś jest zacofano, terozki no kill jest modne i bestorz jo bez ryb prziszoł.

Niy cza iść do fiszhali coby jakiego kapra do siatki wsadzić, niy cza tela na futer wydować. Jednym słowym, baby na łowisku to super ekonomia. Żodne zwionzki wyndkarskie niy muszom zarybiać ino kaperować baby do chytanio!!! Jakby ich było tela co nos, to karty mogłyby kosztować i sześć razy wiyncyj a i tak niy byłoby ważne, czy ryby sie chyci. Baby zaś swoje na takie ryby niy mogesz zabrać, bo ze złości Twoje kije by wylondowały w hasioku.

Old_rysiu