Rozważania starzika (3)
Data: 06-09-2004 o godz. 09:00:00
Temat: Bajania i gawędy


Jakie to sie wody niy łoglondało. Z łojcym czynsto my jeździli syrynkom na ryby. Bynzyna była ponoć bardzo tanio i niy było problemow z zakupiyniym. Jeździli my po całyj Polsce. Wszyndzie karta wyndkarsko była ta sama.



Co byda Wom pisoł o Mazurach, o rzeczkach na Bieszczadach, o Dunajcu wele Żabna. Napisza Wom tako jedna ciekawostka, co som żech przeszoł, jak kiedyś my na wczasach byli pod namiotym kaś pod Kołobrzegiym nad rzekom Parsynta. Niy było to wtynczos żodno woda krainy pstronga i lipiynia.

Łojciec tam chytoł piykne szczupoki i wyngorze. Jedno co było na mojij gowie, to żywiec. Wajski tam pływały ale były bardzo kiepskie, ani sie niy spodziejesz, juz basisko pokazywała. Na pierona martwy żywiec? Łazili my to w gora rzeki to w doł, aż znod jo tako fajno woda. Wyglondała jak jaki stowek, fest zarośniynty. Były tam miejsca, kaj dolyść szło. Woda niy była cołkim głymboko. Czasym 1 meter abo i dwa. W zakolach połno żabich łoczek. To takie malućkie kółka zielone, jedno wele drugiego. Robi sie z tego dywan, i zaciepać tam frupka niy idzie. Mama kozała nom takie żabiory przinosić kaczkom, łone to lubiały stond wiedziłech, że tam musi być jakoś ryba, bo u nos w takich to żabiorach fol karaskow siedziało.

Znodech małe oczko wolne łod żabiorow i zaciepuja tam glizda. Niy było głymboko i łod razu frupek ucieko pod woda. Pacza - karasek. No to mom do łojca fajnego żywca. Zaciepywać cza było fest daleko. Miołech problymy z trowom, bo ynges mi sie w nij motoł. Pomiyntejcie, że wtynczos trza było z bymbynka ynges na trowa ukłodać a potym ciepać zestaw. Jak ynges za trowa sie chycił, to robił sie taki kołtun, że potym niy szło go łodplontać. Boł na to sposób. Trza seblyc cwiter i położyć go na trowie. Potym na tyn cwiter ynges poukłodać tak, coby niy zaczepioł nic. No to już mogech ciepać dalij.

Roz za dużo tego yngesu mi sie ułożyło i frupek polecioł aż na te żabiory. Prasnoł z hukiym, zrobiła sie dziura ale frupek leżoł na tych żabiorach. Zanim ech nazod z cwitra ynges nawinoł na bymbynek, pacza a frupek pikuje pod żabiory. No to zacinom. Jak mi kijek wygiyno, to już ech wiedzioł, co mom ryba ale jako - niy. Myncza sie, ta rompluje jak gupio i muli woda aż sie żur robi. Wreszcie jom na siła ciongna. Ynges fest mocny gorzowski to sie niy boja. Wreszcie mom jom na brzegu. Jakiś dziwny kaper pełnołuski ino wonsow niy mo. Kieby niy boł taki srogi, myślołbych co to karach. Ale karachy som małe a niy takie wielkie. Leca z nim do łojca. Tyn podziwoł sie na niego i pado: - Kaj tyś takiego piyknego karacha wyciongnoł.

No to go prowadza. Łojciec zaczon tyż chytać. Łoba my na te karachy sie zasadzili. Ale my chytali na wolnym łoczku i same karaski brały. Łojciec je na żywca broł i sie cieszył, co takie fajne miejsce ech znod. Ale takiego wielkiego karacha niy było. Jakiś zaś dziyń na karaski ech sie wybroł. Zaś frupek za daleko roz poszybowoł i wpod w te żabiory. No i jak wtynczos zaś karach wielki walnoł w glizda. Wtynczos ech sie kapnoł, kaj te karachy wielkie siedzom. Zarozki na drugo strona ech poloz i łod tyj wielkij łachy żabiorow zaczon jo wyndkować. Frupek przeciepołech na wolno woda i pomału ściongoł na łacha. Jak frupek dobił do żabiorow, to żech czekoł. Niy cza było dugo czekać. Karachy tam już sie biły ło ta glizda, a jo mioł ich coroz wiyncyj.

Wyglondołech przi tym jak smolorz, cołki czorny, bo wszyndzie te żabiory sie czepiały. Łojciec kozoł mi do rzeki włazić w ciuchach i sie tam wyprać. Potym dopiyro zaczyli my normalne pranie. Dobrze, że to było lato.

Dzisioj połno takich stawikow i starorzeczy. Choćby takich jak pokozoł nom niydowno Docio. Ale skond łoni mieli wiedzieć kaj chytać ryby?

Old_rysiu








Artykuł jest z
www.pogawedki.wedkarskie.pl

Adres tego artykułu to:
www.pogawedki.wedkarskie.pl/modules.php?name=News&file=article&sid=936